Джастын Бібэр заканчвае кар'еру

Амэрыканскія і брытанскія таблёіды спаборнічаюць, камэнтуючы сыход Джастына Бібэра на "музычную пэнсію". Некаторыя журналісты лічаць, што музыка не зьбіраецца адмаўляцца ад далейшых выступаў. На іх думку, малады канадзкі артыст выканаў піяр-ход, каб зьвярнуць увагу на фільм "Believe", які выходзіць на шырокія экраны кінатэатраў. У ім прадстаўленая гісторыя кар'еры Бібэра. Дарэчы, сьпявак ня ўпершыню аб'яўляе пра свой сыход "на пэнсію".

Джастын Бібэр - без сумневу адзін з самых папулярных поп-сьпевакоў. Няма практычна дня, каб ідал падлеткаў не зьявіўся на вокладках таблёідаў, а яго песьня не прагучала ў музычных гіт-парадах.

Малодага артыста ў 2012 годзе высока ацанілі журналісты часопісу "Forbes", які зьмясьціў Бібэра на 3 месцы самых высокааплатных постацяў шоў-бізнэсу да 30 гадоў. Толькі за дванаццаць месяцаў малады канадзец зарабіў $55 млн.

У сваю чаргу брытанскі "The Observer" апублікаваў даклад, паводле якога Джастын Бібэр у сацыяльных сетках больш уплывовая фігура, чым Барак Абама або Далай-лама.

эб