Праз 9 гадоў пасьля крушэньня ўрадавага самалёту, які 10 красавіка 2010 году з польскай дэлегацыяй на борце адпраўляўся ў Катынь, да гэтага часу цяжка сказаць без сумневаў, якія былі прычыны катастрофы. Таму сёньня некаторыя ў Польшчы мяркуюць, што неабходна канцэнтраваць сваю ўвагу перш за ўсё на памяці пра ахвяр трагедыі.
У розных гарадах Польшчы, а таксама за яе межамі ў сераду праходзяць урачыстасьці ўшанаваньня памяці 96 чалавек, у тым ліку прэзыдэнта Леха Качыньскага, якія загінулі пад Смаленскам. Прэзыдэнцкая пара пахаваная ў Кракаве, у каралеўскай рэзыдэнцыі Вавэль. Прэзыдэнт Анджэй Дуда ўшанаваў памяць Марыі і Леха Качыньскіх у Кракаве разам з Мартай Качыньскай, дачкой трагічна памерлай прэзыдэнцкай пары. Яны ўдзельнічалі ў богаслужэньні і маліліся каля саркафагу, усклаўшы да яго кветкі.
Анджэй Дуда казаў, што 10 красавіка – гэта дзень памяці пра ахвяр, і гэтую памяць неабходна берагчы.
А. Дуда: Гэта для нас вельмі важна, памяць пра тых, хто загінуў, выконваючы свае дзяржаўныя абавязкі. Для іх гэта быў абавязак памятаць пра іншых ахвяр, яны ж паехалі ўшанаваць памяць польскіх афіцэраў, забітых у Катыні ў 1940 годзе. Я цешуся, што мы тут сёньня разам, можам ушанаваць іх памяць, бо нам іх вельмі не хапае. Як штогод, мы аддаём пашану спадару прэзыдэнту Леху Качыньскаму, яго жонцы Марыі Качыньскай, а таксама ўсім тым, хто тады нас пакінуў, зусім нечакана. Калі б яны жылі, магчыма, у Польшчы было б цяпер інакш, было б лепш, калі б былі ў жывых тыя людзі, якія тады паехалі ў Катынь і загінулі, тыя, хто верна служыў Рэчы Паспалітай.
Урачыстасьці з нагоды гадавіны трагедыі, шэсьці памяці адбыліся ў розных гарадах Польшчы, а таксама за яе межамі. У Варшаве каля Прэзыдэнцкага палацу прайшла пераклічка загінуўшых, усіх 96 ахвяр крушэньня самалёту, сумесная малітва і ўскладаньне кветак. У богаслужэньні, якое прайшло перад гэтым, удзельнічалі блізкія ахвяр і прадстаўнікі дзяржаўных уладаў. Ксёндз Зьдзіслаў Такарчык прамовіў малітву за ўсіх тых, хто загінуў 9 гадоў таму.
Кс. З. Такарчык: Мы хочам іх перадаць міласэрнаму Богу. Мы глыбока верым, што ён побач з імі, што яны побач з ім, што яны радуюцца, будучы блізка каля яго. Мы просім, Міласэрны Ісус, дай ім дар вечнага жыцьця.
Памятныя ўрачыстасьці ў 9-ую гадавіну Смаленскай авіякатастрофы і 79-ыя ўгодкі Катынскай трагедыі адбываюцца ў Смаленску і Катыні. Дэлегацыі з Польшчы ўсклалі кветкі на месцы крушэньня самалёту і адправіліся ў Катынь. Перадае карэспандэнт Польскага радыё Мацей Ястшэмбскі.
М. Ястшэмбскі: На польскіх могілках у Катыні прайшла імша за палякаў, забітых у розных кропках Савецкага Саюзу. Удзельнікі падзеі перш за ўсё казалі пра польскіх афіцэраў-ахвярах НКВД. 4400 забітых у 1940 годзе афіцэраў спачывае ў катынскай зямлі. Згадвалі таксама 96 ахвяр крушэньня польскага ўрадавага самалёту ў 2010 годзе. Пра гэтыя дзьве трагедыі казаў на катынскіх могілках пасол Рэчы Паспалітай Польшчы ў Расеі Ўладзімеж Марціняк. У Катыні маліліся таксама польскія дыпляматы, расейскія палякі і група паломнікаў, якія прыбылі з Польшчы.
Таксама беларускія палякі не забываюць пра трагічна загінуўшых прадстаўніках урадавай дэлегацыі, якія загінулі 9 гадоў таму пад Смаленскам, а таксама пра палякаў, забітых 79 гадоў таму ў Катыні. Па словах Анжэлікі Борыс, старшыні непрызнанага беларускімі ўладамі Саюзу палякаў у Беларусі, СПБ заказаў сьвятую імшу ў касьцёле.
А. Борыс: Саюз палякаў заказаў імшу ў пабэрнардынскім касьцёле ў памяць усіх ахвяр, як забітых у Катыні, так і загінуўшых у выніку крушэньня ўрадавага самалёту.
Богаслужэньне за ахвяр авіякатастрофы прайшло і ў Берасьці. Не забываюць пра ахвяр гістарычных трагедый таксама ў іншых дзяржавах. Урачыстае богаслужэньне было адпраўлена між іншым у храме сталіцы Нямеччыны, у Бэрліне. Шануюць памяць прэзыдэнта Леха Качыньскага і ў Вільні. Будучы на сваёй пасадзе, тагачасны прэзыдэнт Польшчы наведаў Летуву з рабочым візытам 16 разоў.
нг