Польскія гарады рыхтуюцца да пракату аўтамабіляў

POLITYKA: Неўзабаве ў некаторых польскіх гарадах пачнуць працу гарадзкія пракаты аўтамабіляў. Гэта будзе гарадзкая сетка аўтапракату, якая павінна паўтарыць посьпех гарадзкога пракату ровараў. Старт аўтапракату цягам некалькіх месяцаў плянуе ня толькі Варшава, дзе паявіцца 300-500 спэцыяльна пазначаных аўтамабіляў. Пра такую магчымасьць думаюць таксама ва Ўроцлаве, Кракаве й Познані. Ва Ўроцлаве ўжо нават аб’яўлены тэндэр на апэратара, які будзе займацца пракатам каля 200 аўтамабіляў.

Ідэя ва ўсіх гарадах падобная. Горад падпісвае дамову з прыватнай фірмай, якая купляе альбо бярэ машыны ў лізінг. Аўто можна будзе браць на пракат пры дапамозе адмысловага прыстасаваньня, як і гарадзкія ровары. Для гэтага трэба зарэгістравацца ў сыстэме, выслаць адсканаваныя правы кіроўцы ды пакласьці грошы на рахунак.

На першы пункт позірку ідэя выглядае абсурдна, бо па й так перапоўненаму аўтамабілямі гораду будзе езьдзіць дадатковы транспарт. Усё ж мэта аўтапракату – зьмяншэньне колькасьці аўтамабіляў у гарадах.

«Мы хочам заахвоціць частку гараджан адмовіцца ад уласных аўтамабіляў. Калі ім часамі спатрэбіцца аўто, то яны змогуць узяць яго на пракат хутка й лёгка дзякуючы новай сыстэме. Навошта ўтрымліваць аўтамабіль, плаціць дарагую страхоўку, шукаць месца для паркоўкі, калі мы й так ім рэдка карыстаемся?», – гаворыць Лукаш Пухальскі, які ў Варшаве распрацоўвае сыстэму аўтапракату.
Такія пракаты вельмі папулярныя, напрыклад, у Бэрліне. Там працуе дзесяць розных сыстэм, а апэратары пракатаў не наракаюць на адсутнасьць кліентаў.

Колькі будзе каштаваць пракат? Пакуль невядома, паколькі гарадзкія ўлады толькі пачынаюць перамовы з зацікаўленымі фірмамі.

ав