Адчыняецца першая крама «Reserved» у Менску

Крама зьявіцца ў першай палове 2017 у гандлёвым цэнтры «Minsk Mall».

У апошнія гады польскія фірмы хутчэй пакідалі рынкі краін былога Савецкага Саюзу, а не ўваходзілі на іх. Тым часам польская група LPP, якая каціруецца на варшаўскай біржы, уладальнік такіх брэндаў як «Reserved», «Mohito» і «Cropp», паведаміла пра дэбют у Беларусі. У гандлёвым цэнтры «Minsk Mall» зьявіцца першая крама з шыльдай «Reserved».

- Мы ўжо некалькі гадоў абмяркоўвалі магчымасьці ўваходу на беларускі рынак, на якім яшчэ няма нашых глябальных канкурэнтаў. Гэта вельмі пэрспэктыўны рынак. Тым больш, што ў Менску паўстае чарговы сучасны гандлёвы цэнтар і мы хочам быць там першымі, – кажа намесьнік старшыні LPP Славамір Лабада (Sławomir Łoboda), адказны за інвэстыцыі й разьвіцьцё фірмы.

Паводле яго, польскі брэнд добра вядомы беларусам дзякуючы шопінгам у паўночна-ўсходняй Польшчы.

Цягам двух гадоў LPP адчыніць у Менску яшчэ дзьве крамы, але даволі асьцярожна, бо гэта ня будуць фірмовыя крамы, а франшыза.

Старшыня Саюзу працадаўцаў тэкстыльнай прамысловасьці Тадэвуш Ваўжыняк (Tadeusz Wawrzyniak) зазначае, што невялікая зацікаўленасьць беларускім рынкам не зьвязаная з палітычна-эканамічнымі ўмовамі краіны.

- Гэта справа невялікай пакупніцкай здольнасьці. Мы экспартуем у Беларусь, між іншым, мужчынскія касьцюмы, аднак мы ня можам разьлічваць на вялікі продаж. Мы таксама супрацоўнічаем зь беларускай кампаніяй, якая прадае нашу прадукцыю ў Расею, – зазначае Тадэвуш Ваўжыняк.

Puls Biznesu/яс