Чвэрць швэдаў падтрымлівае змаганьне зь іміграцыяй

У Швэцыі нацыяналісты заваёўваюць усё больш сымпатый выбаршчыкаў. Партыя Швэдзкія дэмакраты сама сябе лічыць нацыяналістычнай, хаця яе апанэнты называюць гэту групу папулісцкай.

У апытаньні грамадзкай думкі, праведзеным у ліпені, партыя Швэдзкія дэмакраты атрымала 21% падтрымкі. А паводле іншых даных, партыю, якую ўзначальвае Джымі Акесон, падтрымліваюць 28% жыхароў каралеўства.

Як лічаць экспэрты, рост падтрымкі гэтай палітычнай сілы выкліканы дыскусіяй аб іміграцыі і інтэграцыі.

Швэдзкія дэмакраты не выступаюць супраць мігрантаў, але лічаць, што “міграцыя павінна трымацца на такім узроўні, каб не ўяўляць пагрозы ідэнтычнасьці швэдаў, іх дабрабыту і бясьпецы”.

Нацыяналісты патрабуюць абмежаваньня магчымасьцей для іншаземцаў у атрыманьні ў Швэцыі палітычнага прытулку. Прычым яны супраць наданьня такім людзям права пастаяннага пражываньня, а згодны дазволіць толькі часовае — пакуль бежанцам пагражае небясьпека на іх бацькаўшчыне.

Таксама Швэдзкія дэмакраты патрабуюць зрабіць больш жорсткімі ўмовы прыняцьця грамадзянства — са здачай экзамена на веданьне швэдзкай мовы.

Ад Швэдзкіх дэмакратаў можна пачуць і даволі радыкальныя заявы. Так, віцэ-сьпікер парлямэнта, прадстаўнік гэтай партыі Б’ёрн Сёдэр заявіў, што габрэі і саамы — гэта ня швэды.

Саамы жывуць на поўначы Швэцыі, а таксама Фінляндыі і Расеі і на гэтых тэрыторыях зьяўляюцца карэнным насельніцтвам.

Тым часам прадстаўнік цэнтрысцка-правай Памяркоўнай кааліцыйнай партыі Ульф Крыстэрсон лічыць, што папулярнасьць Швэдзкіх дэмакратаў вырасла не на пустым месцы: “За іх многія хочуць галасаваць толькі таму, што гэта была адзіная партыя, якая жадала дыскутаваць пра іміграцыю, калі мы самі гэтага не рабілі”.

Rzeczpospolita/вк