Міністар навукі тлумачыў у ЗША сэнс польскага Закону аб ІНП

Падчас візыту ў ЗША польскі віцэ-прэм’ер, міністар навукі і вышэйшай адукацыі Яраслаў Говін (Jarosław Gowin) сустрэўся з дырэктаркай Музэю Галакосту Сарай Блюмфільд (Sara Bloomfield) – нагадвае інтэрнэт-выданьне «Niezalezna.pl». Гаворка падчас сустрэчы ішла, у прыватнасьці, пра польскі Закон аб Інстытуце нацыянальнай памяці, у які нядаўна былі ўнесеныя папраўкі, стаўшыя прычынай пратэстаў габрэйскіх колаў. Закон уводзіць крымінальную адказнасьць за ўскладаньне на Польшчу віны за злачынствы гітлераўцаў падчас вайны, забойствы габрэяў.

Адной з мэтаў візыту Яраслава Говіна было патлумачыць прычыны ўнясеньня паправак у закон. «Я пераконваў маю суразмоўцу, што польскі ўрад хоча змагацца выключна з хлусьнёй на тэму калектыўнай адказнасьці палякаў, польскай дзяржавы за саўдзел у Галакосьце. Я таксама пераконваў яе, што закон ніякім чынам не нясе пагрозы свабодзе слова, свабодзе выказваньня тых сьведкаў, якія перажылі Галакост, і таксама не абмяжоўвае ніякім чынам навуковых дасьледаваньняў», – заявіў Говін.

Віцэ-прэм’ер мяркуе, што закон ня стане прычынай падзелаў паміж польскім і габрэйскім народамі або паміж Польшчай і ЗША. Ён дадаў, што польскі ўрад чакае рашэньня Канстытуцыйнага суду па пытаньні закону.

niezalezna.pl/нг