А. Міхнік: Крокі Пуціна немагчыма прадбачыць

Ці тое, што адбываецца ва Ўкраіне, было непазьбежным - такoе пытаньне журналіст Newsweek Polska задаў галоўнаму рэдактару выданьня Gazeta Wyborcza Адаму Міхніку. "Для мяне гэта было нечаканым", – кажа Міхнік. Апошнія 30 гадоў палітыка Расеі раз была лепшай, раз горшай, але яе можна было прадбачыць. А цяпер невядома, што Пуцін зробіць заўтра. Магчыма, Пуцін вядзе сваю краіну да катастрофы, якая будзе вынікам ізаляцыі Расеі ў сьвеце.

Магчыма, замежнікі не разумеюць, чым зьяўляецца Ўкраіна для расейцаў, што там нараджалася Расея. Сапраўды, Кіеў даволі доўга быў больш расейскім горадам, а нават больш польскім, чым украінскім. Але гэта было даўно, цяпер такія разважаньні ня маюць сэнсу. Палякі таксама калісьці не ўяўлялі сабе, што Вільня і Львоў перастануць належаць да Польшчы, але так сталася, ну і што?

Ці Пуціна можа было паўстрымаць, і ці цяпер гэта яшчэ магчыма? Гэта агромная праблема. Адзінай сілай, здольнай да гэтага, зьяўляюцца ЗША, разам з Эўропай.

Ці ёсьць магчымасьць ваеннай пагрозы для Польшчы? Пакуль што не – кажа Міхнік, але невядома, што будзе праз год. Пуцін, як сказала Ангела Мэркель, страціў кантакт з рэальным сьветам. Не выключаю, што Ўкраіна стане для яго другім Афганістанам, паразай Расеі. Пуцін выпусьціў джына з бутэлькі, ён становіцца закладніком вялікарускіх нацыяналістаў.

Міхнік гаворыць, што ён размаўляў з Пуціным некалькі разоў. Першы раз расейскі прэзыдэнт зрабіў на яго добрае ўражаньне. Але другі раз яму здавалася, што размаўляе з гангстэрам. “Калі я спытаў Пуціна пра Хадаркоўскага, той так на мяне зірнуў, што калі б позірк мог забіваць, я ўжо быў бы мёртвы”, - распавядае Адам Міхнік у выданьні Newsweek Polska.

Newsweek Polska/нг