Рым далучыўся да праекту «Адзін пояс, адзін шлях»

Міністры ўрадаў Кітая ды Італіі ў прысутнасьці старшыні КНР Сі Цзіньпіна і прэм'ер-міністра Італіі Джузэпэ Контэ падпісалі ў Рыме мэмарандум, які стане асновай для шырокамаштабнага эканамічнага супрацоўніцтва і гандлю. Сума двухбаковых пагадненьняў ацэньваецца ў 20 мільярдаў эўра.

Кітайская ініцыятыва «Адзін пояс, адзін шлях» зьяўляецца праектам па будаўніцтве сеткі транспартных спалучэньняў паміж Кітаем і рэштай сьвету. Пэкін ужо ўклаў у яго 700 мільярдаў даляраў ЗША.

Цяпер кітайскі бок хацеў бы ўзяць удзел у пашырэньні партоў Трыеста і Генуі. Таксама падпісаныя іншыя пагадненьні, якія павялічаць італьянскі экспарт у Кітай на 7 мільярдаў эўра.

Злучаныя Штаты ды Эўрапейскі Зьвяз выказалі занепакоенасьць тым, што Італія можа стаць пляцдармам эканамічнай экспансіі Кітая, што створыць пагрозы сыстэме бясьпекі.

Паводле неафіцыйнай інфармацыі, з-за гэтага Італія не падпісала пагадненьняў аб супрацоўніцтве з Кітаем у галіне тэлекамунікацый, авіяцыі і суднабудаваньні.

ПР/юл