Амэрыканскія сэнатары хочуць заблякаваць будаўніцтва Nord Stream 2

39 амэрыканскіх сэнатараў ад абедзьвюх палітычных партый рашуча выказаліся супраць газаправода Паўночны паток 2. У лісьце, адрасаваным кіраўнікам міністэрства казначэйства і замежных справаў, сэнатары заклікалі заблякаваць будаўніцтва газаправода шляхам увядзеньня санкцый у дачыненьні да кампаній, якія ўдзельнічаюць у праекце.

Паводле сэнатараў, будаўніцтва трубаправода будзе крокам назад на шляху да дывэрсыфікацыі паставак энэрганосьбітаў у Эўропу. На іх думку, будаўніцтва Nord Stream 2 у абыход Украіны ліквідуе адну з галоўных прычын, чаму Расея ня вырашылася на поўнамаштабную вайны на ўсходзе Ўкраіны.

Аўтары ліста заклікаюць Дональда Трампа выкарыстаць усе магчымыя меры, уключаючы санкцыі.

Прыняты ў мінулым годзе закон дае Дональду Трампу магчымасьць увядзеньня санкцый у дачыненьні да эўрапейскіх кампаній, якія ўдзельнічаюць у праекце Паўночны паток 2, што можа прывесьці да заблякаваньня будаўніцтва трубаправода. Прэзыдэнт ЗША, аднак, не наважыўся на гэты крок.

яс