У выніку ўзброеных канфліктаў асабліва пакутуюць дзеці

Каля 50 мільёнаў дзяцей ва ўсім сьвеце былі вымушаныя пакінуць свае дамы, паведамляе ЮНІСЭФ - фонд Аб'яднаных Нацыяў для дапамогі дзецям. Узброеныя канфлікты прымусілі каля 30 мільёнаў непаўнагадовых пакінуць свае дамы, а пакуты й перасьлед ахапілі 20 мільёнаў дзяцей.

„Многія зь іх у сваім цяперашнім месцы знаходжаньня падвяргаюцца перасьледу й зьняволеньню. Прычынай гэткай сытуацыі часта зьяўляецца адсутнасьць дакумэнтаў і адпаведнага юрыдычнага статусу”, - гаворыцца ў справаздачы арганізацыі.

Дзеці, якія зьяўляюцца ахвярамі вайны, перш за ўсё маюць патрэбу ў тэрміновай гуманітарнай дапамозе, падкрэсьліваюць аўтары дакумэнту.

У 2015 годзе каля 100 тысяч дзяцей у пошуках прытулку й бясьпекі былі прымушаныя пакінуць свае дамы без дарослых. Гэта ў 3 разы больш чым годам раней.

Апрача таго, дзеці складаюць ужо палову бежанцаў, якія былі вымушаныя пакінуць сваю радзіму. Каля 45% зь іх паходзяць з Сырыі й Афганістану.

Падчас уцёкаў ім асабліва пагражае страта жыцьця, голад і гандляры жывым таварам.

Нагадаем, у канцы верасьня адбудуцца дзьве сэсіі Генэральнай Асамблеі ААН, прысьвечаныя бежанцам.

аз