Статую Хрыстуса паставяць у Назарэце

Ізраільскі палітык-хрысьціянін арабскага паходжаньня Шлаян Бішара прапанаваў усталяваць у Назарэце самую вялікую ў сьвеце статую Езуса Хрыстуса, вышэйшую па сваіх памерах за знакамітую статую ў бразыльскім горадзе Рыа-дэ-Жанэйра, паведамляе агенцтва KAI.

Бішара, які заснаваў партыю "Сыны Запавету", што аб'ядноўвае хрысьціян і жыдоў, ужо пачаў збор сродкаў на рэалізацыю свайго праекту, падтрыманага жыхарамі Назарэту.

Паводле задумы палітыка, статуя ў Назарэце будзе павялічанай копіяй статуі Хрыста Збавіцеля ў Рыа-дэ-Жанэйра, пад якую штогод прыязджаюць каля 1,8 мільёна турыстаў.

Вышыня статуі ў Бразыліі разам з цокалам складае 38 мэтраў, а размах рук Хрыстуса – 28 мэтраў. Агульная вага збудаваньня – больш за тысячу тон.

Памеры статуі, якую прапануецца ўсталяваць у Назарэце, пакуль не агучваюцца. Экспэрты мяркуюць, што яны будуць залежаць ад памеру сабраных сродкаў на рэалізацыю праекту.

эб