Гэта не атака, а вучэньні

Ракеты, запушчаныя 3 верасьня зь Міжземнага мора, былі вучэбнымі мішэнямі для сыстэмы супрацьракетнай абароны Ізраіля, паведамляе Reuters са спасылкай на інфармаваную крыніцу.

Як паведаміў суразмоўца РИА Новости ў Ізраілі, запуск быў праведзены ў рамках сумесных з ЗША вучэньняў. Мішэні, запушчаныя зь Міжземнага мора, былі пасьпяхова адсочаныя радарамі, разьмешчанымі на тэрыторыі Ізраіля.

Сыстэма папярэджаньня аб ракетным нападзе ўдзень 3 верасьня зафіксавала пуск двух «балістычных аб'ектаў» з акваторыі Міжземнага мора. Паводле зьвестак расейскага боку, абодва аб'екты ўпалі ў мора.

На дадзены момант на Міжземным моры нясуць баявое дзяжурства як мінімум пяць амэрыканскіх караблёў, на ўзбраеньні кожнага зь якіх – па 92 крылатыя ракеты «Тамагоўк». Амэрыканскія ўлады не выключаюць , што яны могуць быць выкарыстаныя дзеля нанясеньня ўдару па Сырыі, калі 9 верасьня адпаведнае рашэньне прыме Кангрэс ЗША.

Злучаныя Штаты Амэрыкі і шэраг іншых краін Захаду мяркуюць, што ўрад Сырыі павінен быць пакараны за «прымяненьне хімічнай зброі супраць уласных грамадзян». Афіцыйны Дамаск адмаўляе, што выкарыстаў хімічную зброю, і абяцае даць адпор любому патэнцыйнаму агрэсару.

эб/lenta.ru