Стаўка рэфінансаваньня павышана

З заўтрашняга дня стаўка рэфінансаваньня ў Нацбанку Польшчы павысіцца на чвэрць працэнта, - такое рашэньне прыняла Рада грашовай палітыкі падчас свайго сёньняшняга паседжаньня ў Варшаве.

Павышэньня стаўкі спадзявалася частка польскіх эканамістаў. Тым ня менш некаторыя адмыслоўцы зьвярталі ўвагу на тое, што ненайлепшыя вынікі прамысловай вытворчасьці ў Польшчы ды магчымасьць запавольваньня эканомікі будуць для рады аргумэнтам для таго, каб пакінуць стаўку на ранейшым узроўні.

Эканамісты лічаць, што павышэньне стаўкі ня будзе эфэктыўным дзеяньнем у барацьбе зь інфляцыяй, якая вынікае галоўным чынам з эканамічнай сытуацыі за мяжой.

Рост стаўкі рэфінансаваньня ў Нацбанку азначае, што павысяцца траншы крэдытаў й працэнты па грашовых укладах у польскай валюце.

Згодна рашэньню Рады грашовай палітыкі з заўтрашняга дня стаўка рэфінансаваньня Нацыянальнага банку Польшчы складзе 4,75%.

аз