У Польшчы створаць дакладную 3D-мадэль Калоскай царквы

Польскія спэцыялісты сфатаграфавалі ў Калоскай царкве кожны мілімэтар і плянуюць стварыць да канца года 3D-мадэль гістарычнага помніка. Макет зьявіцца ў сеціве на сайце kolozha.by.

Як паведамляе рэгіянальная газэта «Вечерний Гродно», група вучоных з Польшчы зрабіла вымярэньні ўсіх паверхняў Каложы звонку й знутры самым сучасным на сёньня мэтадам — фотаграмэтрыяй.

Праект па ахове культурных помнікаў за мяжой фінансавала Міністэрства культуры Польшчы.

Дакладнасьць вымярэньняў — менш за мілімэтар. Былі таксама зафіксаваныя ўсе пашкоджаньні. Дадаткова спэцыялісты сфатаграфавалі кожны сантымэтар царквы спэцыяльным прыборам.

З дапамогай гэтых здымкаў да канца года плянуецца стварэньне трохмернай мадэлі храма. Вынікі гэтых вымярэньняў стануць асновай для любых аднаўленчых прац. Яны не дазволяць парушыць арыгінальныя памеры храма.

Калі ў працэсе штосьці разбурыцца, то мадэль дапаможа дакладна ўзнавіць страчаны фрагмэнт. Акрамя таго, аб’ёмная даставерная ілюстрацыя царквы дапаможа завабіць турыстаў і падкрэсьліць прэстыж гістарычнага помніка.

catholic.by/ав