Польшча пазнаёміла ЭЗ з плянам рэструктурызацыі шахтаў

Польшча пазнаёміла Эўрапейскую камісію з праграмай рэструктурызацыі горназдабыўной прамысловасьці ў краіне. З гэтай мэтай сёньня ў Брусэль накіраваўся ўпаўнаважаны польскага ўраду па рэструктурызацыі польскіх шахтаў Войцех Кавальчык. Ён сустрэўся зь Гертам Янам Копманам - намесьнікам Генэральнага дырэктара па справах канкурэнтназдольнасьці, які адказвае за дзяржаўную дапамогу ў ЭЗ.

Эўракамісія павінна ацаніць, ці падтрымка, якую дзеля выратаваньня польскай горназдабыўной прамысловасьці хоча выдзяліць польскі ўрад, адпавядае патрабаваньням ЭЗ.

Віцэ-міністар Кавальчык заявіў, што сёньняшнія перамовы з прадстаўнікамі камісіі былі “вельмі канструктыўнымі”, і гэта, паводле яго, станоўчы прагноз.

Тым ня менш прадстаўнік Міністэрства эканомікі не хацеў казаць пра дэталі. Ён дадаў, што наступная сустрэча па гэтай справе можа адбыцца цягам бліжэйшых тыдняў.

аз