Палякі шануюць сваю электратэхніку

З пункту гледжаньня выдаткаў на электратэхніку Польшча знаходзіцца ў хвасьце Эўропы. Больш на гэткія набыткі выдаткоўваюць у суседніх краінах.

Сярэднестатыстычны паляк траціць на электратэхніку толькі 187 эўра ў год. За апошнія гады гэтая сума павялічылася на некалькі эўра.

Паводле экспэртаў, гэта перш за ўсё зьвязана з даўжэйшай эксплюатацыяй такіх вырабаў. Проста палякі ня могуць сабе дазволіць настолькі часта, як, напрыклад, заходныя суседзі, мяняць тэхніку.

Паводле розных дасьледаваньняў, ажно 20% электратэхнікі прадаецца па інтэрнэце. Па велічыні абаротаў, гэта найбойнейшая катэгорыя ў інтэрнэт-гандлі.

Дасьледчыцкая фірма „GfK” у сваім дакладзе паведамляе, што кошт польскага рынку электроннага абсталяваньня складае больш за 27 млрд. злотых.

У найлепшыя гады рынак электратэхнікі павялічваўся ў тэмпе некалькіх працэнтаў у год. Усё ж апошнім часам ён або згортваецца, або расьце максымальна на некалькі адсоткаў.

Таму агульная сытуацыя ня вельмі аптымістычна й не выклікае надзеі на наступны год.

Самыя пэсымістычныя прагнозы прадстаўляюць аналітыкі „Euromonitor International”. Яны прагназуюць некалькі гадоў заняпаду.

Вядома, ёсьць і выключэньні, як смартфоны, тэлепрыстаўкі й пляншэты, продаж якіх па-ранейшаму расьце ў рэкордным тэмпе.

аз