Польскія левыя дамагаюцца зьмены дзяржаўных сьвятаў

Партыя хоча зьмяніць закон, пераглядаючы абавязкі дзяржаўных структураў ды органаў мясцовага самакіраваньня.

Прычына такога кроку – няроўны падыход дзяржаўных установаў да сьвяткаваньня Дня працы 1-га траўня й Сьвята сьцяга й Канстытуцыі – 2 і 3-га траўня. Прадстаўнік СЛД паведаміў, што 1 траўня кіраўніцтва краіны сышло ў палітычную эміграцыю.
Левыя сілы зьбіраюцца падаць новы законапраект адносна дзяржаўных сьвятаў і парадку іх сьвяткаваньня на пачатку чэрвеня. Яны дамагаюцца, каб у закон быў унесены запіс адносна ідэалягічнай і рэлігійнай нэўтральнасьці пры адзначэньні дзяржаўных сьвятаў.

Апроч таго, СЛД патрабуе пашырэньня ролі няўрадавых арганізацый у адзначэньні дзяржаўных урачыстасьцяў.

Незадавальненьне левых выклікае таксама малая колькасьць дзяржаўных сьвятаў – толькі 7 дзён. Пры гэтым толькі 3 зь іх непрацоўныя дні, тады як 10 непрацоўных дзён – гэта рэлігійныя сьвяты.

юл