Пачала працаваць другая нітка „Nord Stream”

fot. PAP/EPA/STEFAN SAUER

Учора адбыўся афіцыйны запуск другой ніткі Паўночнага газаправода („Nord Stream”), які па дне Балтыйскага мора пастаўляе расейскую сыравіну ў Заходнюю Эўропу.

Яцэк Ціборскі з кансалтынгавай кампаніі „PwC” лічыць, што дадатковы калідор транспарту газу, які абмінае тэрыторыю Польшчы, некарысны для палякаў.

Яцэк Ціборскі: З аднаго боку, гэта сапраўды ня надта карысна для Польшчы. З другога – праблемы нельга перабольшваць. Цяпер фактычна абмяжоўваюцца пастаўкі расейскага газу традыцыйнымі шляхамі, але перш за ўсё гаворка ідзе пра скарачэньне транзыту праз тэрыторыю Ўкраіны, Славаччыны й Чэхіі. Тым часам, Ямальскі газаправод, які праходзіць праз тэрыторыю Польшчы, па-першае, танны, а па-другое, дзякуючы таму што ён праходзіць праз тэрыторыю Беларусі, дае Расеі гарантыю рэалізацыі паставак. Таму скарачэньне транзыту газу з Расеі ў Заходнюю Эўропу закране галоўным чынам Украіну.

- зазначае Яцэк Ціборскі.

Карысьці можа прынесьці пабудова газаправодаў-спалучэньняў на заходняй мяжы Польшчы, але гэта патрабуе шмат часу, - заўважае экспэрт.

Яцэк Ціборскі: Будова злучэньняў з Паўночным газаправодам будзе працягвацца многія гады. Але толькі пасьля іх пабудовы - недзе ў 2016 годзе - можна будзе гаварыць пра дывэрсыфікацыю паставак газу ў Польшчу.

- кажа Яцэк Ціборскі.

Паўночны газаправод ужо амаль год транспартуе расейскую сыравіну ў Нямеччыны. Ягоная першая нітка пачала працаваць 8 лістапада 2011 году. Цяпер, пасьля ўвядзеньня ў дзеяньне другой - магутнасьць трубаправода павялічыцца да 55 мільярдаў кубамэтраў паліва ў год.

аз