Кіроўца тралейбуса зьбіла дзяўчынку

З-за лютых маразоў беларускія дарогі пераўтварыліся ў коўзанкі. Аварыі здараюцца паўсюдна. А ў Віцебску з-за галалёду тралейбус ня змог затармазіць і зьбіў дзяўчынку.

13-гадовая школьніца кінулася перабягаць дарогу на чырвоны сыгнал сьветлафора. І трапіла пад тралейбус. Жанчына-кіроўца, па словах інспэктараў ДАІ, зрэагавала й паспрабавала затармазіць. Але не змагла. Дарогі з-за лютых маразоў пераўтварыліся ў коўзанкі. Дзяўчынку пасьля ўдару аб тралейбус адкінула на шашу. Але, дзякуй Богу, траўма аказалася ня самая сур’ёзная – усяго толькі пашкоджаньне стапы.

Непрызвычаеныя да лютых маразоў беларускія кіроўцы блытаюцца. Выглядаюць дарогі сухімі, разьметку добра відаць. А значыцца, на думку нармальнага кіроўцы, і шчапленьне з дарогай мусіць быць нармальным. Але, насамрэч, дарогі пакрыты слоем празрыстага лёду.

Аварыі ў часы маразоў адбываюцца ледзь не праз кожныя 500 мэтраў.

З гэтай прычыны ДАІ рэкамэндуе кіроўцам рухацца ў гарадах з хуткасьцю ня большай за 40 кілямэтраў у гадзіну.

А на хуткаснай кальцавой аўтадарозе ў Менску расстаўляюць часовыя абмежавальныя знакі, якія патрабуюць не разганяцца больш як да 50 км/г.

Аляксандар Парошын