У Беларусі пабіты тэмпэратурны рэкорд дня за ўвесь пэрыяд мэтэаназіраньняў

Тэмпэратурны рэкорд дня за ўвесь пэрыяд мэтэаназіраньняў быў пабіты 12 чэрвеня, піша сайт naviny.by.

Пра гэта сьведчыць праведзены параўнальны аналіз апэратыўнай карты тэмпэратур і архіва Белгідрамэта.У Жлобіне паветра прагрэлася да 34,7 градуса вышэй за нуль, што на 0,3 градуса перавышае абсалютны максымум, зафіксаваны ў 2010 годзе ў Лельчыцах (Гомельская вобл.). У самым Жлобіне ранейшы рэкорд дня складаў 32,4 градуса (таксама з 2010 года).

Абнавіліся экстрэмумы ў сталіцы і ўсіх абласных цэнтрах. У Магілёве было 34,6 градуса (31,1 у 2000 годзе), у Гомелі – 33,4 (32,6 у 2010-м), Берасьце і Віцебску – 33,2 (адпаведна 32,8 у 1957 годзе і 31, 5 у 1937-м), Менску – 32,7 (30,9 у 2000-м), Горадні – 32,4 (31,3 у 1999-м).

Тэмпэратурныя рэкорды фіксуюцца дзевяты дзень запар. 12 чэрвеня стала самым гарачым днём у гэтым годзе і першым за гэтыя дзевяць дзён, калі абнавіўся максымум для ўсёй краіны з пачатку мэтэаназіраньняў.

Напярэдадні ў Менску ўпаў рэкорд дня 82-гадовай даўніны (32,2 супраць 30,1 градуса 11 чэрвеня 1937 года). Да канца тыдня вельмі гарачае надвор'е захаваецца. Сёньня ў Менску чакаецца 30-32 градусы вышэй за нуль. Можа быць пабіты абсалютны рэкорд дня 107-гадовай даўніны.

ав