Беларускія ваенныя праводзяць інспэкцыю ў Нарвэгіі

Беларускія ваенныя ў адпаведнасьці з палажэньнямі Венскага дакумэнта 2011 года аб мерах умацаваньня даверу і бясьпекі з 3 па 7 чэрвеня праводзяць інспэкцыю на тэрыторыі Нарвэгіі, піша беларуская газэта «Звязда».

«Мэтай інспэкцыі зьяўляецца праверка ваеннай дзейнасьці, якая належыць папярэдняму паведамленьню ў адпаведнасьці з палажэньнямі Венскага дакумэнта 2011 года», – адзначылі ў Міністэрстве абароны. Двое прадстаўнікоў беларускай арміі наведаюць на тэрыторыі Нарвэгіі авіябазу і воінскую часьць.

У сваю чаргу ў адпаведнасьці з палажэньнямі Дагавора па адкрытым небе прадстаўнікі Італіі, Фінляндыі й Вугоршчыны правядуць назіральны палёт над тэрыторыямі Беларусі й Расеі. Палёт будзе ажыцьцяўляцца на AН-26, які належыць Вугоршчыне. Мэтай назіральнага палёту зьяўляецца кантроль ваеннай дзейнасьці на тэрыторыях абраных дзяржаў.

zviazda.by/эж