У Горадні запрацуе аўтаматызаваная сыстэма пракату ровараў

У Горадні неўзабаве запрацуе першая аўтаматызаваная сыстэма пракату ровараў у Беларусі. У траўні пачнецца яе вялікі тэст-драйв, для чаго набяруць каля сотні валанцёраў. На працягу месяца яны бясплатна будуць абкатваць ровары, а пасьля выкажуць заўвагі й прапановы.

Як інфармуе «Беларусь сегодня», на поўную магутнасьць аўтаматызаваны пракат можа запрацаваць ужо гэтым летам. Гарадзенцы вырашылі скарыстацца досьведам шэрагу краін ЭЗ. Была створаная мабільная праграма, якая дазваляе не вяртаць ровар у тое месца, дзе яго ўзялі на пракат, а пакінуць у іншым. Гэта, безумоўна, зручна для людзей.

Праект стартуе зь сямі кропак арэнды й будзе пашырацца. Ён мае падтрымку мясцовых уладаў.

У бліжэйшай будучыні чакаецца запуск падобнай сыстэмы і ў Менску, дзе налічваецца каля 800 тыс. аматараў экалягічнага віду транспарту. Агулам беларусы валодаюць 1,5 млн ровараў.

радыё рацыя/вс