«Гарадзенскія Мальдзівы» ператвараюць у сьмецьцезвалку

У ваколіцах маляўнічых кар’ераў «Сінька» і «Зялёнка» у лесапарку Пышкі пад Горадняй працягваюць скідаць будаўнічае сьмецьце ў прамысловых маштабах. Амаль 200 мэтраў лясной веласьцежкі наўпрост засыпалі сілікатнымі блёкамі, арматурай і цэглай. Адкіды галоўным чынам ідуць з «Спецаўтагаспадаркі» (САГ) ды Камбінату будаўнічых матэрыялаў (КБМ), што месьціцца побач.

На тэрыторыю лесапарку побач самазваламі вывезлі каля 30 поўных машын адкідаў, чым зьнішчылі кавалак лясной дарогі прыкладна ў 200 м – наўпрост завалілі.

Адзначым, што ў лесапарку Пышкі каля пяці год таму рэалізоўваўся сумесны з Эўразвязам рэкрэацыйны праект, які датычыўся Летувы, Латвіі і Беларусі. Паводле праекту ў Пышках уздоўж Нёмана, а таксама ў раёне «Сінькі» і «Зялёнкі» паўсталі альтанкі, веласьцежкі ды ўказальнікі.

Колішнія кар’еры «Сінька» і «Зялёнка» сталі адным з улюбёных месцаў для адпачынку гарадзенцаў.

belsat.eu/яс