На МАЗе работнікаў прымушаюць браць выходныя за свой кошт

На МАЗе асобных работнікаў прымушаюць браць выходныя за свой кошт. Пра такую зьяву распавялі TUT.by некаторыя супрацоўнікі прадпрыемства. Як высьветлілася, у лістападзе дзьве суботы будуць працоўныя – 10-га і 24-га. Гэта зьвязана з тым, што ў студзені завод пойдзе на канікулы.

Людзі кажуць, што іх папрасілі напісаць на гэтыя дні заявы «за свой кошт», але ніякіх папер і загадаў не давалі. Таксама супрацоўнікі сьцьвярджаюць, што быццам ім пагражалі нават непадпісаньнем кантракту ў выпадку адмовы.

На прадпрыемстве журналістам патлумачылі, што сапраўды прапаноўвалі людзям узяць адпачынкі, але гэта тычыцца тых, хто не мае дастатковай занятасьці. Калі ж чалавек «прыходзіць і проста адседжваецца», яго просяць напісаць заяву. Кіраўніцтва не адмаўляе, што чалавек можа адмовіцца падпісваць заяву – і тады яму дадуць працу на суботу.

эўрарадыё/вс