У Лельчыцкім раёне ўсю ноч шукалі 4 жанчын, якія заблукалі ў лесе

Паведамленьне пра іх зьнікненьне паступіла ў раённы аддзел міліцыі 15 верасьня ў 22.50 ад жыхара Турава. Мужчына паведаміў, што чатыры сяброўкі пайшлі ў журавіны ў лес каля вёскі Сымоніцкі Млынок яшчэ раніцай, але дадому не вярнуліся. Жанчынам ад 54 да 82 гадоў.

Зьніклых шукалі супрацоўнікі РАУСа, МНС, лясьнічыя й валянтэры. Урэшце жанчын знайшлі раніцай 16 верасьня, у 11.00 у 5 км ад вёскі Тонеж Лельчыцкага раёна. Іх стан быў здавальняючы, паведамляе прэс-служба Гомельскай абласной міліцыі.

Пазьней высьветлілася, што адна з жанчынаў да пераезду ў Жыткавіцкі раён жыла ў гэтых мясьцінах, таму і прапанавала сяброўкам пайсьці ў лес у журавіны.

euroradio.fm/эж