Мытнікі фіксуюць рост спробаў незаконнага ўвозу кветак у Беларусь

З пачатку лета гарадзенскія мытнікі спынілі незаконны ўвоз на тэрыторыю Беларусі больш за 100 тысяч руж, паведаміла Гарадзенская рэгіянальная мытня.

Кветкавая прадукцыя агульным коштам звыш 70 тыс. рублёў выяўленая на беларуска-летувіскім напрамку мяжы ў пунктах пропуску „Беняконі”, „Катлоўка” і „Каменны Лог”. Атрымальнікамі тавару ў большасьці выпадкаў зьяўляліся аптовыя расейскія фірмы.

Адно з апошніх парушэньняў выяўленае ў пункце пропуску „Беняконі”. Мытны кантроль кветкавай прадукцыі, якую перавозіў летувіскі перавозчык у адрас расейскага атрымальніка, выявіў у грузавым адсеку аўтамабіля „Вольва” кветкі, не пазначаныя ў дакумэнтах. Адсутнічалі зьвесткі больш чым пра 10 тыс. руж даўжынёй 40 см. Кошт тавару, які незаконна перамяшчаўся, склаў амаль 9 тыс. рублёў.

Распачаты адміністрацыйны працэс у адпаведнасьці з ч. 1 арт. 14.5 КоАП Рэспублікі Беларусь. Дадзены артыкул прадугледжвае штраф да 30% ад кошту тавару, які незаконна перамяшчаўся.

belapan.by/аз