Урад Беларусі хоча падоўжыць бязьвізавы рэжым для замежнікаў да 21 дня

Такую прапанову ўнёс у Палаце прадстаўнікоў міністар спорту й турызму Сяргей Кавальчук. Паводле яго слоў, міністэрства падтрымлівае любое павелічэньне бязьвізавага тэрміну, бо гэта дазволіць замежнікам наведваць беларускія санаторыі. Менавіта 21 дзень – як раз стандартная працягласьць пуцёўкі.

Паводле Белстату, з моманту ўвядзеньня пяцідзённага бязьвізавага рэжыму для грамадзянаў 80-ці краінаў у лютым мінулага году Беларусь наведала больш за 100 тысяч турыстаў.

Агулам летась у нашай краіне гасьцілі амаль 300 тысяч чалавек, а выручка дзяржавы ад аказаньня турыстычных паслуг склала каля $ 82 млн даляраў.

паводле belsat.eu/эж