Біяграфія Юзафа Пілсудскага ўпершыню выйшла на беларускай мове

Па-беларуску выйшла кніга пра жыцьцё і дзейнасьць галоўнага героя адроджанай у ХХ ст. Польшчы. Якіх палітычных поглядаў ён прытрымліваўся? Да якой належаў нацыянальнасьці? Як яму ўяўлялася рэанімаваная Польшча? Чаму атрымалася ня так, як задумваў Пілсудскі? Што падштурхнула яго да перавароту 1926 года? Пілсудскі – Беларусь: якім быў вопыт стасункаў? Гэтыя і многія іншыя пытаньні турбавалі аўтара – вядомага ў Польшчы гісторыка, прафэсара Ўладзімежа Сулею.

У Польшчы яго біяграфічны твор вытрымаў два выданьні, кніга перакладзена на некалькі эўрапейскіх моў. Дасьледаваньне прафэсара абапіраецца на шырокую базу разнастайных дакумэнтальных крыніц – ад сьведчаньняў сучасьнікаў і самога Пілсудскага да архіўных матэрыялаў і навуковых распрацовак вучоных. Аўтару ўдалося стварыць грунтоўнае і дакладнае апісаньне фігуры Пілсудскага як простага, сьціплага чалавека і вядучага палітычнага дзеяча эпохі.

Кніга Ўладзімежа Сулеі «Юзаф Пілсудскі» выйшла з друку літаральна на днях у выдавецтве «Янушкевіч» пры падтрымцы Польскага Інстытута ў Менску. Пераклад Яўгена Салейчука.

23 траўня адбудзецца прэзэнтацыя кнігі. У ёй прымуць удзел аўтар Уладзімеж Сулея, беларускія гісторыкі, выдавец Андрэй Янушкевіч. Мадэратарам сустрэчы выступіць Анатоль Трафімчык.

Прэзэнтацыя адбудзецца 23 траўня а 18-й гадзіне ў канфэрэнцыйнай залі гатэля «Манастырскі» (Менск, вул. Кірыла і Мяфодзія, 6). Уваход вольны.

Польскі інстытут/ав