Грамадзянін дамагаўся пакараньня чыноўніка і журналісткі

Чытач партала ABW.by Аляксандр Максіменя заўважыў у эфіры тэлеканала АНТ правапарушэньне. Падчас сюжэту пра Капыльскі раён у «Контурах» у кадры зьявіліся старшыня райвыканкама Анатоль Ліневіч і журналістка АНТ. І абое непрышпіленыя.

Неабыякавы грамадзянін напісаў заяву ў ДАІ з просьбай даць сытуацыі юрыдычную ацэнку.

«Па выніках праведзенай праверкі кіроўца і пасажыр аўтамабіля Hyundai прыцягнуты да адміністрацыйнай адказнасьці», – гаворыцца ў адказе выканаўцы абавязкаў начальніка упраўленьня ДАІ УУС Мінаблвыканкама Міхаіла Акуліча.

Аператара – які таксама быў непрышпілены – пакуль не аштрафавалі.

Адметна, што ў падобнай сытуацыі ДАІ адмовілася штрафаваць Аляксандра Лукашэнку спасылаючыся на яго недатыкальнасьць.

nn.by/яс