У Беларусі стала лепей з карупцыяй і горш з дэмакратыяй

Экспэрты міжнароднай праваабарончай арганізацыі Freedom House апублікавалі чарговае штогадовае дасьледаваньне пра «Краіны ў пераходным пэрыядзе», у якім ацэньваюць разьвіцьцё дэмакратычных інстытутаў у краінах Цэнтральнай, Усходняй і Паўднёвай Эўропы.

Беларусь не зьмяніла сумарны паказьнік «дэмакратычнасьці» — 6,61 з 7 балаў (больш балаў азначае менш дэмакратыі).

Паводле справаздачы, у Беларусі крыху лепшай стала сытуацыя ў барацьбе з карупцыяй, горшай — з «нацыянальным дэмакратычным кіраваньнем».

Дэмакратыя ў Беларусі на такім узроўні як у Расеі (пагоршылася з 6,57 да 6,61 бала). Горшы паказьнік маюць толькі Азэрбайджан, Казахстан, Таджыкістан, Туркмэністан і Ўзбэкістан.

Пра Беларусь пішуць як пра дзяржаву, дзе «акапаўся» пэрсаніфікаваны аўтарытарны рэжым, які трымае ўладу жалезнай рукой, душыць палітычную канкурэнцыю, змагаецца з актывістамі і журналістамі, якія адважваюцца выступаць супраць уладаў.

19 з 24 краінаў у дасьледаваньні Freedom House маюць паказьнікі, горшыя за ранейшыя. Найбольшае зьніжэньне рэйтынгаў паказалі Вугоршчына і Польшча. У ліку краінаў, якія пагоршылі паказьнікі, таксама былі Летува, Латвія, Украіна.

svaboda.org/яс