Польскія консульствы за 2017 год выдадуць беларусам каля 400 тыс. віз

За 2017 год польскія консульствы, як мяркуецца, выдадуць беларусам каля 400 тыс. віз. Такую лічбу ў камэнтары парталу tut.by назваў Надзвычайны й Паўнамоцны Амбасадар Польшчы ў Беларусі Конрад Паўлік.

«Ці будзе віз столькі ж, як летась, ці крыху больш – мы зможам зразумець літаральна праз два тыдні», – патлумачыў дыплямат.

Дакумэнты на польскія й шэнгенскія візы ў Беларусі можна падаць у 12 цэнтрах: трох консульствах (Горадня, Берасьце і консульскае аддзяленьне польскай амбасады ў Менску), васьмі візавых цэнтрах, а таксама ў консульстве Латвіі ў Віцебску.

Конрад Паўлік паведаміў, што польскі бок імкнецца выдаваць усё больш шматразовых і доўгатэрміновых віз. Паводле яго словаў, попыт на польскія візы расьце ва ўсёй Беларусі.

«Гэта, вядома, нас радуе. Калі згадаць папярэднія гады, то атрыманьне візы, у тым ліку і ў польскім генконсульстве, ажыцьцяўлялася больш складана», – дадаў ён.

эўрарадыё/вс