Рэктары ВНУ хочуць павысіць парог прахадных балаў па профільных прадметах

Тэрмін рэгістрацыі на цэнтралізаванае тэставаньне могуць скараціць зь месяца да трох тыдняў. Такая прапанова прагучала 28 ліпеня на пасяджэньні рэспубліканскага савета рэктараў устаноў вышэйшай адукацыі. У пасяджэньні прыняў удзел міністар адукацыі Ігар Карпенка.

Рэктары прапанавалі праводзіць рэгістрацыю на ЦТ з 10 траўня па 1 чэрвеня.
Таксама яны рэкамэндавалі Мінадукацыі павысіць парогавыя значэньні прахадных балаў па профільных прадметах. Гэта дазволіць зрабіць прыём абітурыентаў у ВНУ больш якасным.

Пры гэтым рэктары адназначна падтрымалі ЦТ як аптымальную форму правядзеньня ўступных іспытаў. Разам з тым правілы прыёму ў ВНУ будуць удасканальвацца і далей.

Напрыклад, прагучала прапанова, каб на завочнае аддзяленьне ВНУ (як на бюджэт, так і на платнае) выпускнікі сярэдніх навучальных установаў маглі паступаць толькі пры наяўнасьці працоўнага стажу. Гэтую ініцыятыву падтрымаў міністар адукацыі.

У той жа час было прапанавана падтрымліваць працуючых па спэцыяльнасьці выпускнікоў устаноў прафтэхадукацыі й каледжаў, а таксама абітурыентаў, якія прайшлі тэрміновую вайсковую службу або службу ў рэзэрве й маюць рэкамэндацыі вайсковых часьцей.

белта/эўрарадыё/вс