Беларус прадаў нырку, каб зладзіць вясельле й адпачыць у Эгіпце

Трое беларусаў сталі ахвярамі «чорных трансплянтолягаў», аднак зарабілі па сем тысяч даляраў за органы. Грамадзянін Беларусі прадаў нырку дзеля двухтыднёвага адпачынку на курорце ў Эгіпце й арганізацыі вясельля, паведамілі ў эфіры тэлеканала СТВ.

Злачынная схема «чорных трансплянтолягаў» з Косава была раскрытая яшчэ ў 2007 годзе – высьветлілася, што ахвярамі сталі трое беларусаў. Згодна з агучанай дзяржаўным тэлебачаньнем інфармацыяй, беларусам за продаж донарскіх органаў плацілі па сем тысяч даляраў.

Аднаго мужчыну праапэравалі ў Косаве, другога – у Эквадоры, трэцяга – у Кіеве. Адзін з «пацыентаў» расплаціўся такім чынам за арганізацыю вясельля й два тыдні адпачынку ў Эгіпце, астатнія купілі за гэтыя сродкі скутар й ноўтбук.

У сюжэце нагадалі й пра тое, што камэрцыялізацыя працэсу абмену органамі крымінальна караецца.

наша ніва/вс