На выставе ў Менску дэманструецца машына для разгону акцый пратэсту

ТАА «Пажснаб» (Барысаў) стварыла спэцыяльны аўтамабіль хуткага рэагаваньня «Шторм». Машына, як паведамляе яе вытворца, прызначаная для апэрацыяў падразьдзяленьняў МУС па спыненьні групавых супрацьпраўных дзеяньняў і масавых беспарадкаў.

Аўтамабіль служыць для дастаўкі да месца правядзеньня апэрацыі экіпажа, вады і спэцсродкаў, процідзейнічае групам асобаў, якія парушаюць грамадзкі парадак, шляхам узьдзеяньня на іх вадой і спэцсродкамі.

«Шторм» створаны на базе МАЗ-6317Х9 з колавай формулай 6×6. Максымальная хуткасьць — 80 км у гадзіну. Баявы разьлік — 3 чалавекі. Умяшчальнасьць цыстэрны для вады — 9 тон. Пажарная помпа — 50 літраў у сэкунду. Аўтамабіль забясьпечвае ўзьдзеяньне вадзянога струменю на 30 — 50 мэтраў, маркіруючае дзеяньне фарбавальнікаў, абарону і жыцьцезабесьпячэньне баявога разьліку, кругавы агляд у любы час сутак, магчымасьць фіксаваць, захоўваць, праглядаць відэаінфармацыю пра навакольны стан.

Машына дэманструецца на выставе ўзбраеньня і вайсковай тэхнікі ў Менску Milex-2017.

паводле Радыё Свабода/нг