Актывісты Гарадзеншчыны просяць кансуляты Летувы й Польшчы пра падтрымку

Сябры БХД накіравалі адкрыты зварот у Консульства Польшчы ў Гародні і Консульства Летувіскай Рэспублікі з просьбай падтрымаць грамадзкую і палітычную супольнасьць Гарадзеншчыны.

У зваротах адзначаецца, што апошнімі днямі складваецца вельмі нэгатыўная тэндэнцыя ў сувязі з масавымі затрыманьнямі актывістаў і лідараў большасьці дэмакратычных партый і рухаў Беларусі. «Існуе рэальная рызыка, што кіраўнікоў і сябраў палітычных партый Гарадзеншчыны, якія адстойваюць канстытуцыйныя правы грамадзян, фактычна могуць ізаляваць», – гаворыцца ў дакумэнтах.

На думку аўтараў звароту, «сытуацыя вядзе да зьнікненьня якога-небудзь грамадзкага дыялёгу і канчатковага звальваньня Рэспублікі Беларусь у жорсткую дыктатуру». У сувязі с гэтым яны запрашаюць прадстаўнікоў кансулятаў Польшчы і Летувы на судовае паседжаньне 14 сакавіка з мэтай маніторынгу сытуацыі і далейшага пераказу гэтых фактаў у Эўрапейскія дэмакратычныя структуры, а таксама 15 сакавіка на мітынг у Парку Жылібера. «Будзем удзячныя Вашай увазе і спадзяемся на Вашу падтрымку», – гаворыцца ў зваротах.

bchd.info/яс