Зубры – нашчадкі вымерлых быкоў, якія жылі ў Францыі

Вучоныя раскрылі паходжаньне зуброў з Белавескай пушчы. Аказваецца, іх продкі прыйшлі ў Беларусь і Польшчу з Пірэнейскіх гор – паведамляе Радыё «Свабода» са спасылкай на часопіс Newsweek.

Сёньняшнія белавескія зубры – гэта нашчадкі вымерлых старажытных быкоў, якія жылі некалі на тэрыторыі Францыі, і чые выявы пакінулі на сценах пячораў у Пірэнейскіх гарах паляўнічыя ледавіковай эпохі. У выніку генэтычных дасьледаваньняў высьветлілася, што сучасныя зубры ўзьніклі каля 120 тысячаў гадоў таму ў выніку скрыжаваньня празуброў і тураў. Нашчадак двух вымерлых відаў змог перажыць зьмены клімату і выжыў падчас выміраньня эўраазіяцкай мэгафаўны.

На пачатку ХХ стагодзьдзя зубры амаль зьніклі з паверхні зямлі. Падчас Першай сусьветнай вайны немцы, а таксама мясцовае насельніцтва, забівалі жывёл на мяса. За некалькі гадоў пушча амаль цалкам апусьцела. Выжылі толькі 54 зубры. Аднаўленьнем папуляцыі заняліся ўлады Польшчы ў 1929 годзе. Сёньня папуляцыя белавескіх зуброў па абодва бакі беларуска-польскай мяжы налічвае больш за тысячу галоваў.

Svaboda.org/ап