Экалягічных актывістаў будуць судзіць за абарону жывёл

Актывістаў «Экалягічнага Пошугу» і руху «Кошт жыцьця», якія бралі ўдзел у пікеце ў абарону жывёл каля сталічнага Дзяржцырку 17 красавіка, чакаюць суды.

У судзе Партызанскага раёна Менска на 2 чэрвеня прызначаны разгляд адміністрацыйных спраў Вячаслава Касінерава (9-00), Яны Каралёвай (9-20) і Юрыя Пучылы (11-10), Максімільяна Бойчанкі (9-40), Арцёма Каралёва (10-10) і Дар’і Тылецкай (10-50). Іх вінавацяць ва ўдзеле ў несанкцыянаваным масавым мерапрыемстве па арт 23.34 КаАП.

Частка ўдзельнікаў пікету, які адбыўся 17 красавіка, была з завязанымі тварамі, але іх апазнаваў супрацоўнік ГУБАЗу Ігар Луневіч, які асабіста прысутнічаў падчас акцыі.

17 красавіка напярэдадні цыркавога прадстаўленьня актывісты руху «Экалягічны пошуг» і «Кошт жыцьця» заклікалі байкатаваць цыркавое шоу з удзелам дрэсіраваных жывёл. Пікет працягваўся каля 20 хвілінаў. Неўзабаве да актывістаў «Экалягічнага пошугу» падышоў ахоўнік цырку. На месцы таксама аказаліся й людзі ў цывільнай вопратцы з відэакамэрамі.

Пазьней, у сярэдзіне траўня, супрацоўнікі міліцыі ўчынілі сапраўдную аблаву на ўдзельнікаў пікету.

Вясна/ав