Пункт «Лоша» гатовы да атрыманьня міжнароднага статусу

Вынікі экспэрымэнту ў пункце спрошчанага пропуску «Лоша» на беларуска-летувіскай мяжы паказалі яго гатоўнасьць да атрыманьня міжнароднага статусу, паведамілі агенцтву «Інтэрфакс-Захад» у прэс-цэнтры Дзяржаўнага памежнага камітэта Беларусі.

З 15 сьнежня па 15 студзеня памежнікі правялі экспэрымэнт. Яго мэта – падрыхтоўка да зьмены статусу памежперахода на міжнародны, а таксама вывучэньне прапускных магчымасьцяў з улікам магчымага павелічэньня патоку грамадзян і транспарту падчас калядных і навагодніх сьвятаў.

Падчас экспэрымэнту на легкавым аўтатранспарце ў беставарным варыянце тут маглі перасекчы мяжу грамадзяне Беларусі й Летувы, незалежна ад іх месца жыхарства. За гэты час праз мяжу прапушчана каля 5,7 тыс. асоб. Гэта ўтрая больш, чым у звычайным рэжыме.

На думку прадстаўнікоў ДПК, экспэрымэнт паказаў здольнасьць пункта спрошчанага пропуску «Лоша» прымаць вялікія патокі людзей і транспарту, а таксама гатоўнасьць да міжнароднага статуту. Атрымаць дадзены статус ён зможа пасьля стварэньня неабходнай інфраструктуры й завяршэньня неабходных працэдур зь летувіскім бокам.

Пункт спрошчанага пропуску «Лоша» (сумежны пункт пропуску – «Шумскас») разьмешчаны ў Астравецкім раёне Гарадзенскай вобласьці. Выкарыстоўваецца толькі для руху легкавога транспарту, зарэгістраванага ў Беларусі й Летуве, а таксама ў пешым парадку. Прапускная здольнасьць – 450 аўтамабіляў у суткі. Мытны кантроль не ажыцьцяўляецца.

Інтэрфакс/ав