Нашчадкі Агінскага прыедуць у Залесьсе

Каля 50 гасьцей запрошаны да ўдзелу ў юбілейных ўрачыстасьцях у гонар 250-годзьдзя з дня нараджэньня Міхала Клеафаса Агінскага 25 верасьня ў музэі-сядзібе ў Залесьсі Смаргонскага раёна. Будуць прысутныя нашчадкі Агінскага па лініі дачкі Амэліі - Лідзія, Зыгмунт і Ганна Зялінскія з Познані (Польшча).

Сьвяткаваць юбілей у сядзібе знакамітага кампазытара й грамадзкага дзеяча будуць на працягу пяці дзён. 23 і 24 верасьня праходзіць міжнародная канфэрэнцыя «Спадчына М.К.Агінскага ў культуры трох народаў».

Галоўныя мерапрыемствы адбудуцца 25 верасьня. У сядзібным парку адкрыюцца тры творчыя тэатралізаваныя пляцоўкі. На адной зь іх школьнікі й студэнты зладзяць пленэр і створаць сучасныя пэйзажы «Паўночных Афінаў» пад Смаргоньню. Другая пляцоўка стане прытулкам муз для залескага тэатра «Батлейка». На трэцяй гледачы ўбачаць тэатралізаваны паказ конна-спартыўнага клюба «Залатая шпора».

Спэцыяльна да юбілею кампазытара прымеркавана адкрыцьцё музэйнай экспазыцыі, якую наведвальнікі ўбачаць упершыню пасьля рэканструкцыі сядзібы.

У сядзібе Залесьсе вядомы грамадзкі дзеяч, дыплямат і кампазытар Міхал Клеафас Агінскі жыў каля 20 гадоў (з 1802 па 1822). Тут ён стварыў свой самы вядомы твор - палянэз «Разьвітаньне з Радзімай».

Белта/ав