У Ерэване праходзіць паседжаньне ПА „Эўранэст”

У Ерэване праходзіць сумеснае паседжаньне Парлямэнцкай асамблеі „Эўранэст” і Форуму грамадзянскай супольнасьці.

У дэлегацыі працоўнай групы па Беларусі Эўрапейскага парлямэнту — кіраўнікі сямі палітычных структур Беларусі: Анатоль Лябедзька (Аб’яднаная грамадзянская партыя), Сяргей Калякін (Беларуская партыя левых „Справядлівы сьвет”), Уладзімір Някляеў (грамадзянская кампанія „Гавары праўду”), Ірына Вештард (Беларуская сацыял-дэмакратычная партыя (Грамада), Аляксандар Мілінкевіч ( рух „За свабоду”), Віталь Рымашэўскі (БХД), Рыгор Кастусёў (Партыя БНФ).
Прадстаўнікоў афіцыйнага Менску ў Ерэван не запрасілі.
Лідар Аб’яднанай грамадзянскай партыі Анатоль Лябедзька нагадаў, што гэта першае паседжаньне групы пасьля абраньня новага складу Эўрапейскага парлямэнту.

Анатоль Лябедзька не выключае, што падчас сустрэчы адбудзецца дыскусія аб прадстаўніцтве Беларусі ў Парлямэнцкай асамблеі „Эўранэст”.
„Гэтае пытаньне было замарожана, але цяпер на палітычным календары Эўропы адліга, таму трэба быць гатовым да дыскусіі. Таксама ў парадку дня бягучая сытуацыя й Рыскі саміт”, — паведамляе прэс-служба АГП.

„Эўранэст” — гэта міжпарлямэнцкая асамблея, створаная для зьбліжэньня з Эўразьвязам дзяржаў — удзельніц праграмы „Ўсходняе партнэрства”. Мяркуецца, што ў „Эўранэст” будуць уваходзіць 60 дэпутатаў Эўрапарлямэнту й 60 дэпутатаў з 6 краінаў — удзельніц „Усходняга партнэрства” (па 10 прадстаўнікоў ад кожнай краіны). Аднак 10 месцаў ад Беларусі на сёньня замарожаныя, паколькі беларускія парлямэнцкія выбары 2012 году (як, зрэшты, і папярэднія) не былі прызнаныя свабоднымі і дэмакратычнымі.

Афіцыйны Менск настойвае на паўнавартасным удзеле беларускай парлямэнцкай дэлегацыі ў працы „Эўранэсту”. У сваю чаргу, дэмакратычныя сілы мяркуюць, што Беларусь у Парлямэнцкай асамблеі „Ўсходняга партнэрства” павінна быць прадстаўлена апазыцыяй.

18 сакавіка на пленарным паседжаньні „Эўранэсту” адбудзецца выступ беларускай дэлегацыі. Слова беларускай дэмакратычнай супольнасьці на пленарным паседжаньні „Эўранэсту” будзе дадзена ўпершыню.

svaboda.org/аз