Да 500-годзьдзя Аршанскай бітвы намалююць карцін на 2 выставы

foto: pl.wikipedia.org

Аргкамітэт па сьвяткаваньні 500-годзьдзя Бітвы пад Воршай абвяшчае конкурс. Да ўдзелу запрашаюцца юныя мастакі - дзеці ва ўзросьце да 15 гадоў, а таксама маладыя мастакі-аматары, кажа намесьнік старшыні аргкамітэту, мастак Мікола Купава.

„Наша мэта - каб пра гістарычную бітву, сэнс якой замоўчваецца прадзяржаўнымі гісторыкамі, скажаецца ідэалягізаванымі выкладчыкамі й настаўнікамі, наша моладзь усё ж даведвалася. І ганарылася слаўнымі продкамі. Таму мы рэкамэндуем, каб удзельнікі пачыталі сапраўдную гістарычную літаратуру”, - гаворыць спадар Купава. Тыт ён зазывае, між іншым, працы прафэсара Анатоля Грыцкевіча, Алега Трусава ці Міхася Чарняўскага.

Адзіная просьба ад арганізатараў - каб удзельнікі дасылалі свае працы ўжо аформленымі ў рамкі.

Паводле вынікаў конкурсу ў Менску будуць арганізаваныя дзьве выставы. Творы малодшых удзельнікаў (да 15 гадоў) будуць экспанавацца ва Ўправе партыі БНФ (вуліца Чарнышэўскага, 3). Творы старэйшай групы канкурсантаў разьмесьцяцца ў памяшканьні „Беларускай прасторы” (вуліца Скарыны, 12). Адкрыцьцё абедзьвюх выставаў заплянаванае на 5 верасьня — за 3 дні да 500-х угодкаў славутай Бітвы пад Воршай.

svaboda.org/аз