На „Пінскдрэве” скарацілі працоўны тыдзень

„Фарміруецца тэндэнцыя, якая пакуль не набыла маштабных памераў, але ўсё часьцей беларускіх працоўных на буйных прадпрыемствах пераводзяць на скарочаны графік. Улады папросту не знайшлі эканамічнай мадэлі, каб прамысловасьць эфэктыўна працавала, а працоўным маглі выплочваць дастойны заробак”, – так камэнтуе старшыня Беларускага кангрэсу дэмакратычных прафсаюзаў Аляксандр Ярашук перавод на скарочаны графік працы прадпрыемства „Пінскдрэў”.

„Правы працоўных у сёньняшняй Беларусі менш за ўсё непакояць беларускія ўлады. Тым больш, што тая арганізацыя, якая сёньня нясе адказнасьць за лёс беларускіх працоўных, у якой зараз зноў прымусова знаходзяцца амаль 100% працуючых, зьяўляецца прыдаткам дзяржаўнай сыстэмы кіраваньня й ніякага ўплыву ня толькі не аказвае, але яшчэ і ўтрымлівае працоўных у рабскім становішчы.

Прадпрыемства „Пінскдрэў” скараціла працоўны тыдзень, рабочых адпраўляюць у вымушаныя адпачынкі. Чатырохдзённы працоўны тыдзень уведзены з пачатку чэрвеня. Загад падпісаны генэральным дырэктарам прадпрыемства Аляксандрам Суднікам.

Аналягічныя загады будуць на прыватных і сумесных прадпрыемствах, створаных пры ўдзеле „Пінскдрэва”.

Беларускае Радыё Рацыя/аз