«Сфагнум» — гіт продажаў за травень

Нагадаем, што твор выйшаў у двух варыянтах — электроннай кнігай на расейскай мове (мове арыгіналу) на 34mag.net, а таксама асобным папяровым выданьнем на беларускай мове ў перакладзе Віталя Рыжкова.

Якраз «Сфагнум», апублікаваны ў выдавецтве «Кнігазбор» (сэрыя «Кнігарня пісьменьніка»), згодна са статыстыкай «Белкнігі», за апошнія тры дні месяца стаў лідарам продажаў за травень.

Крытык Ганна Янкута ў рэцэнзіі на раман «Сфагнум» адзначае: «Калі ўявіць сабе кампазыцыю „Сфагнума“ ў выглядзе шкілета, то гэта будзе адзін з самых добра складзеных і гарманічных шкілетаў, зь якімі я сутыкалася апошнім часам у беларускай літаратуры. Агульны ход падзеяў у творы вывераны добра, напружаньне дазуецца акуратна, зацягнутых эпізодаў, якія прымусілі б асабліва нецярплівага чытача пераскокваць праз абзацы, няма».

А на сайце 34mag.net паведамляецца, што замежныя выдаўцы Марціновіча ўжо празвалі гэты раман «„Карты, грошы, два ствалы“ ў беларускай правінцыі», зьмясьціўшы яго ў нішу «гангстарскай камэдыі».

Так ці іначай, але скласьці ўласнае меркаваньне можна толькі прачытаўшы кнігу. Выданьні сэрыі «Кнігарня пісьменьніка» можна знайсьці ў крамах па ўсёй Беларусі. Цікаўцеся!

Прэс-служба СБП/nn.by/эб