Сям’я Кавалёва шукае месцa яго пахаваньня

Фота: svaboda.org

Маці й сястра Ўладзіслава Кавалёва, аднаго з двух расстраляных па абвінавачаньні ва ўчыненьні тэракта ў менскім мэтро, просяць паведаміць ім аб месцы яго пахаваньня.

Як сказаў праваабаронца Раман Кісьляк, адпаведную заяву Любоў Кавалёва й Тацьцяна Казяр адправілі 25 красавіка на імя Аляксандра Лукашэнкі, старшыні КДБ Беларусі й начальніка дэпартамэнта выкананьня пакараньняў МУС.

Паводле слоў праваабаронцы, у гэтым звароце маці й сястра Ўладзіслава Кавалёва спасылаюцца на рашэньне Камітэта па правах чалавека ААН, дзе была разгледжана іх скарга.

У прыватнасьці, камітэт указаў, што „захаваньне поўнай сакрэтнасьці адносна месца пахаваньня ўяўляюць сабой запалохваньне й пакараньне гэтай сям'і шляхам наўмыснага ўтрыманьня іх у стане нявызначанасьці й душэўных пакут".

У сваім рашэньні Камітэт ААН зьвярнуўся да беларускіх улад з патрабаваньнем паведаміць аб месцы пахаваньня Ўладзіслава Кавалёва яго маці й сястры, а таксама апублікаваць сваё рашэньне ў сродках масавай інфармацыі й прыняць меры, каб такія парушэньні не дапускаліся ў наступным.

Сваякі Ўладзіслава Кавалёва беспасьпяхова дабіваюцца выдачы яго цела для пахаваньня ў адпаведнасьці з канонамі праваслаўнага хрысьціянства.

БелаПАН/аз