У Польшчы будзе створаны Нацыянальны інстытут анкалёгіі

Міністар аховы здароўя Польшчы Лукаш Шумоўскі паведаміў аб плянах стварэньня Нацыянальнага інстытуту анкалёгіі, а таксама аб пераглядзе сродкаў, якія выдаткоўваюцца на анкалёгію. Кіраўнік ведамства прыняў удзел у дэбатах, прысьвечаных барацьбе з анкалягічнымі захворваньнямі, якія адбыліся ў Варшаве.

Міністар Шумоўскі падкрэсьліў, што анкалёгія – гэта ключавая галіна ў польскай службе аховы здароўя: сем зь дзесяці палякаў паміраюць па прычыне анказахворваньняў і хвароб сэрца.

«У анкалёгіі ёсьць вялікі патэнцыял паляпшэньня, таму што выяўленьне рака й пяцігадовая выжывальнасьць знаходзяцца яшчэ не на такім узроўні, на якім бы нам хацелася. У сувязі з гэтым мы запускаем праграмы па стратэгіі барацьбы з ракам і хочам стварыць Нацыянальны інстытут анкалёгіі, які дазволіць лепш каардынаваць выкрыцьцё на раньніх стадыях злаякасных пухлін, ад якіх паміраюць палякі», – сказаў міністар Шумоўскі.

У Польшчы штогод 160 тысяч чалавек даведаюцца аб тым, што хворыя ракам, больш за 100 тысяч паміраюць па прычыне злаякасных пухлін.

вс