У Варшаве ўведзены стан трывогі ALFA

У Варшаве ў сувязі з самітам NATO, які пачынаецца ў польскай сталіцы заўтра, уведзены першы ўзровень трывогі. Адпаведнае распараджэньне падпісала прэмʼер-міністар краіны Бэата Шыдла.

Згодна распараджэньню, органы дзяржаўнай адміністрацыі атрымалі загад праверкі сыгнальных прылад і тэхнікі, эвакуацыйных шляхоў і працэдур па ўвядзеньні вышэйшых узроўняў трывогі.

Ступень трывогі ALFA дзейнічае з поўначы 7 ліпеня да 23:59 10 ліпеня.
Увядзеньне стану трывогі рэгулюе закон аб антытэрарыстычных дзеяньнях.

У залежнасьці ад сытуацыі ўводзіцца адзін з чатырох узроўняў трывогі: ALFA, BRAVO, CHARLIE, DELTA (A, B,C, D). Апошняя ступень трывогі абʼяўляецца ў выпадку зьдзяйсьненьня тэракту альбо атрыманьня дакладнай інфармацыі аб тым, што падрыхтоўка да тэракту знаходзіцца ў канчатковай стадыі.

У сувязі з самітам NATO частка вуліц ды нават некаторыя раёны сталіцы закрытыя для аўтамабільнага руху.

Сустрэча ў вярхах праходзіць на тэрыторыі Нацыянальнага стадыёну. У саміце ўдзел прымае некалькі тысяч удзельнікаў, у тым ліку прэзыдэнт ЗША Барак Абама.

вс