Польшча зноў не ўпусьціць “Начных ваўкоў”

Чальцоў спрэчнага мотаклюбу “Начныя ваўкі” таксама сёлета ня пусьцяць у Польшчу. Інфармацыю Замежнай рэдакцыі грамадзкай тэлевізіі TVP Info пацьвердзіў прэс-сакратар польскай амбасады ў Маскве Барташ Ціхоцкі.

Як і ў мінулым годзе “Начныя ваўкі” арганізоўваюць ралі “Дарога Перамогі” з Масквы й Бэрлін. Згодна з плянам, матацыклісты сёньня стартуюць з Масквы. Беларуска-польскую мяжу яны плянавалі перасячы 1 траўня. Барташ Ціхоцкі з польскай амбасады прызнаў, што расейскія матацыклісты, якія сьвяткуюць завяршэньне ІІ сусьветнай вайны, не атрымаюць права ўезду на тэрыторыю Польшчы.

МЗС пацьвердзіла, што не пагаджаецца на ўезд у краіну “Начных ваўкоў”. Рашэньне патлумачана неабходнасьцю запэўніць ахову грамадзкага парадку.

Масква абураная рашэньнем Варшавы ў справе “Начных ваўкоў”. “Мы ацэньваем адмову Варшавы, якая пазбаўляе расейцаў магчымасьці аддаць павагу савецкім жаўнерам, як асабліва цынічны й непрыязны жэст, мэтай якога зьяўляецца пагаршэньне расейска-польскіх стасункаў”, - напісана ў заяве МЗС Расеі.

Клюб “Начныя ваўкі” вядомы сваімі нацыяналістычнымі поглядамі й падтрымкай Уладзіміра Пуціна. Яго чальцы займалі актыўную пазыцыю падчас анэксіі Крыму Расеяй. Лідар калектыву Аляксандар Залдастанаў “Хірург” часта адклікаецца да сталінізму.

tvp.info/ав