Краіны Балтыі аб'ядноўваюцца

Краіны Балтыі дамовіліся аб стварэньні сумеснага камітэта, які будзе каардынаваць пытаньні, зьвязаныя з унутранай бясьпекай і грамадзкім парадкам.

Адпаведнае пагадненьне па гэтай справе 16 верасьня ў Рызе падпісаў зь міністрам унутраных спраў Латвіі Рыхардам Казлоўскісам кіраўнік унутрыпалітычнага ведамства Летувы Дайліс Алфонсас Баракаўскас.

17 верасьня летувіскі міністар плянуе падпісаць пагадненьне і ў Таліне зь кіраўніком МУС Эстоніі.

Паводле Баракаўскаса, агульны камітэт экспэртаў „будзе рэагаваць на ўсе пагрозы, ня толькі з Расеі”.

„Плянуецца, што на працягу двух тыдняў кожная краіна павінна будзе назваць прадстаўнікоў, якіх яна дэлегуе ў каардынацыйны камітэт, і экспэрты будуць сустракацца па чарзе ў трох дзяржавах Балтыі”, - дадаў кіраўнік летувіскага МУС .

Падпісаньне пагадненьняў зьвязана з ростам у балтыйскіх краінах занепакоенасьці адносна магчымых правакацый з боку Расеі.

Delfi.lt/eurointegration.com.ua/аз