Вэнджаныя каўбасы ня зьнікнуць

Зь верасьня будуць уведзеныя новыя, строгія правілы Эўрапейскага Зьвязу, датычныя нормаў утрыманьня смалістых рэчываў у харчовых прадуктах. Дапушчальная канцэнтрацыя бэнзапірэну будзе зьменшаная з 5 да 2 мікраграмаў на кіляграм ежы. Гэта амаль што выключае магчымасьць традыцыйнага вэнджаньня сыроў і каўбас на адкрытым агні. Але, як зазначае міністар сельскай гаспадаркі Станіслаў Калемба, здароўе чалавека найважнейшае.

Новыя правілы ствараюць пагрозу прадпрыемствам мясной прамысловасьці. Вытворцы сьцьвярджаюць, што ў выніку могуць зьнікнуць нават больш за 100 кампаній.

Міністар сельскай гаспадаркі зазначае, што большасьць польскіх каўбас не перавышаюць новых нормаў. Яго словы, аднак, не супакойваюць вытворцаў. У іх ацэнцы, з рынку мясных вырабаў зьнікне пах і смак сапраўднай каўбасы. Іх заменяць штучныя хімічныя растворы, якія будуць прыдаваць каўбасам вэнджаны смак, не пакідаючы смалістых рэчываў.

эб