Крымінальнай справы супраць В. Булгакава ня будзе

Былы рэдактар часопіса „ARCHE-Пачатак" атрымаў афіцыйны адказ на запыт, які накіраваў ва Ўпраўленьне Дэпартамэнта фінансавых рассьледаваньняў (УДФР) па Менскай вобл. і г. Менску.

Намесьнік кіраўніка УДФР Бацэвічус піша, што „па выніках праверкі, праведзенай УДФР КДК РБ па Менскай вобласьці й г. Менску, ва ўзбуджэньні крымінальнай справы па арт. 243 КК РБ у дачыненні да Вас... адмоўлена”.

У лiсьце Валеру Булгакаву таксама прапануюць зьявіцца ва УДФР па Менскай вобл. і г. Менску „для вырашэньня лёсу выданьняў”, якія яму належаць.

Аналягічны ліст сп. Бацэвічус адрасаваў ТАА „Інбелкульт” (былы выдавец часопіса, ад імя якога таксама быў зроблены запыт).

Абедзьве паперы датаваная 9-м красавіка.

Запыты ва УДФР былі накіраваныя пасьля зьяўленьня інфармацыі пра адмову ўзбуджаць крымінальную справу па выніках праверкі ўстановы „Рэдакцыя часопіса „ARCHE-Пачатак”": прадстаўнікі рэдакцыі хацелі атрымаць афіцыйныя дакумэнты на гэты конт.

baj.by/аз